ettounsi loughti

ettounsi ki yetouled b2ena lougha ya7ki? bel français?? bel 3arabeya??
ettounsi ya7ki bel tounsi!!
3lech yji nhar y9ouloulou lé rahi hedhika mech loughtek, enti loughtek el 3arbi!!ti howa el 3arbi net3allmouh keyennou lougha mel barra..
mba33ed no93dou behtin ou n9oulou chbih ettounsi ma ya3rafch ya7ki, la ya7ki bel français la bel 3arabeya.. ti c'est normal, ma famma 7atta wa7da menhom loughtou.

s7i7 el 3arbi heya el lougha elli torbotna bel 3rab, ou bel islem ou tmaththel tha9afetna ou terikhna, ama yekhi brabbi chnowa el mouhem, anna n9addmou ou net7assnou walla annano93dou n9oulou ya 7asra 3la kifech konna??

3lech ma ywallich ettounsi loughetna?? hedha ynajjem ybaddel barcha 7ajet!!!

awel 7aja annou ki ywalli ettounsi loughenta twalli el tha9afa fi moutenewel ennes lkollou 7atta elli ma t3allamch belgdé el 3arbi walla el français ywalli ynajjem yet-tha99ef. ou zid el we7ed ki ya9ra 7aja maktouba b'loughtou y7ess-ha 9riba mennou ou men 7yetou ouywalli etta2thir mte3ha a9wa 3lih.
theni 7aja, yekhi kifeh y9isou cha3b met9addem walla metkhallef b'floussou?? lé ma dhaharli, el cha3b el met9addem met9addem b'tha9aftou, ou a7na ki nektbou bel français walla bel 3arbi 9a3din nothriw fi tha9afet okhra, mech tha9afetna a7na ettounseya!!
ou ken n7ebbou nharnwalliw cha3b met9addem lezem twalli 3and-na tha9afa donc lezemna nchajj3ou loughetna,loughet tounes, ettounsi!!

7aja okhra, tawa ennes lkoll fel chera3 el tounsi mettaf9a elli akber mochkla 3anna fi tounes heya mochkelt etta2athor mte3na bel tha9afet lokhra, el gharb wel char9 zeda!!ken n7ebbou na7miw rwe7na ou n7afdhou 3la ta9alidna ou tourathna ou terikhna, lezemna na3rfou kifech nekhdhou mel kharej, mech nestawrdou koll chay!! ou ki tebda enti ta7ki b'lougha mehich loughtek maw ywalli sehel barcha bech elli 9a3ed ta7ki bloughtou y2athther 3lik ou y7awel yerba7 mennek, ybi3lek tha9aftou wel "les produitsderivées" mte3ha ktobba ou aflem ou 7weyej ou "mode de vie"...
ou mba33ed njiw n9oulou chbina a7na ettwensa hakkati maw i7mi rou7ek bech ma ya3mloulekch hakkeka
ou loughetna heya elli ta7mina ou tkhallina na3rfou rwe7na ou na3rfou tha9afetna ou elhouweya mte3na.
Ena ma n9oulech lezemna netsakkrou ou nwaliw ma na7kiw ken loughetna, bel3aks nebdew monfat7in ou na7kiw bel 3arbi khater hedhika teb3a el houweya el 3arabeya mte3na ou na7kiw bel français wel anglais khater hedheka ykhallina fey9in ou monfat7in 3al 3alem. ama ki tebda 3anna loughetna, nebdew monfat7in ama fi nafs el wa9t na3rfou rwe7na chkoun, ou nebdew "fier" bel tha9afa el touniseya mte3na.

yekhi heya chneya el mochkla? kifech bech nektbou bel tounsi? sehel yesser noghzrou juste ba7dhena, famma bled sghira esmha malta, a7na manech fey9in biha, ama heya ta7ki blougha 9riba yesser el loughetna, ou ken ya7ki we7ed bel malti 9oddemek taw tefhmou tellement 9ribam lel tounsi!! wel lougha el malteya hedhi maktouba ou 3and-ha 9awa3ed-ha!! donc sehel barcha bech nchoufouhom kifech 3amlou ou n7awlou ntabb9ou!!